DAVAO CITY – Gikabalak-an nga mosaka pa ang ikatalang patay sa sakit nga dengue sa dakbayan kung dili molampus ang hiniusang paningkamot sa mga health officials sa dakbayan.
Una nang gikatala nga walo na ka mga tawo ang nangamatay sa Southern Philippines Medical Center (SPMC) gumikan sa Dengue ning kasamtangan nga bulan.
Sumala sa hospital management sa SPMC kadaghanan sa mga biktima mga bata nga grabe na ang kahimtang dihang gi-admit hinongdan nga severe dengue ang ilang gikamatyag.
Sumala pa kang Dra. Jeannie B. Ong, Chair sa Dengue Committee sa Southern Philippines Medical Center nga gikatala sab sa SPMC nga mokabat ngadto sa 738 ang ihap sa mga pasyente niini nga nagkadengue sukad niadtong Enero.
Kini ang nag-unang hinongdan nga nagpahimutang gilayon ug fast lane ug dengue ward ang SPMC aron nga maatiman dayon ang mga naghambin sa balati-an.
Gumikan sa kadaghan sa mga pasyente puno-puno na ang tulo ka mga dengue ward, diin kadaghanan sa mga pasyente ug duna pa’y mga nanaglinya ug wala pa napasaka sa dengue ward.
Ang uban nagpabilin pa sa emergency room kadaghanan sa mga pasyente karon dili lamang mga taga-Davao apan lakip na ang mga gikan sa lalawigan.
