DAVAO CITY- Muabot sa walo ka mga driver ug konduktor ang nagpositibo sa druga atol sa gipahigayon nga Oplan Harabas sa Philippine Drug Enforcement Agency (PDEA) XI sa mga nagkadaiyang terminal dinhi sa syudad niadtong nakalabay nga semana.
Kahinumduman nga naandan na nga himoon sa ahensya ang surprise drug test ilabi na kung adunay mga dagkong aktibidad nga ipahigayon sa syudad sama na lamang sa kalag-kalag.
Kini aron nga masiguro nga hapsay ug luwas ang pagbyahe sa mga pampasaherong sakyanan. Anaa sa dul-an kinyentos ka mga driver ug konduktor ang gipailalom sa drug test sulod mismo sa Davao City Overland Transport Terminal, GMall Van Terminal ug uban pa.
Sa pikas bahin, gikumpirma sa tigpamaba sa PDEA XI nga si Noli Dimaandal nga ang buhatan na sa Land Transportation Office (LTO) ang mupasaka og kaso batok sa walo ka mga driver ug konduktor nga nagpositibo sa iligal nga druga.
Kasong kalapasan sa Republic Act 10585 o Anti-Drunk and Drug Driving Act of 2013 ang ipasaka batok sa mga nahisgutan.
