Hingpit ng napasakahan og kaso sa National Bureau of Investigation NBI-XI ang 8 ka Chinese Nationals nga nalambigit sa gikaingong illegal POGO hub ning dakbayan.
Nag-atubang og kasong Online Gambling in relation Cybercrime Law ang gipasaka batok sa walo ka dinakpang langyaw.
Subay sa rekord sa NBI, sa gipagulang impormasyon sa maong buhatan, giila ang 6 ka mga lalaki ug 2 ka mga babayeng Chinese Nationals nga nalambigit sa maong iligal nga operasyon mao sila Songhong Yan, Bingbing Ji, Zhen Wang, Peng Mou ug Zuen Gong nga puros overstaying ug walay mga gipangkuptang dokumento.
Samtang ang laing 3 ka mga inbidwal nga duna nay rekord sa pagkalambigit sa Philippine Offshore Gaming Operators (POGO), mao sila Pengshan Chen, Jinbo Peng ug Dongbie Ling.
Kahinumdumang gibutyag sa National Bureau of Investigation (NBI) 11 nga nahimong usa sa dakong hagit alang kanila ang kalisod gumikan sagad sa pipila ka Homeowners Association, magdumili sa pagpasudlod kanila sa mga subdivision.
Bisan pa niini, gikalipay ni NBI 11 Regional Director Atty. Archie Albao ang kooperasyon sa usa ka homeowner association sa Buhangin, Davao City nga mitaho sa kadudahang lihok sa ilang dapit nga miresulta sa pagkadakop sa mga nahisgutang nalambigit sa ilegal nga operasyon sa POGO.
Nasuta sab nga nagsugod og abang ang mga langyaw sa balay sukad pa niadtong Abril base sa lease contract nga nakuha sa mga operatiba. Nadiskobrehan ang operasyon human misumbong ang usa ka residente nga nagmaoy ang mga langyaw human sa panag-inom.
Gumikan niini, gihangyo ni Atty. Albao ang publiko nga magpabilin nga magbinantayon ug gilayong ireport sa otoridad ang mga kadudahang tawo o kalihokan.
Gipasabot usab niini nga nagbag-o na ang pamaagi sa mga ilegal nga POGO operator, gikan sa dako nga manpower hubs sama sa gi-raid sa Panabo City niadtong Disyembre diin 58 ka mga langyaw ang nadakpan, ngadto sa mas gamay ug gipakalat nga grupo sa nagkalain-laing lugar aron malikayan ang dali nga pagdakop sa otoridad ngadto kanila.
