DAVAO CITY – Gikatakdang ipahigayon dinhi sa dakbayan sa Davao ang 7th annual Philippine Halal trade and tourism expo diin highlight niini ang mga local ug global Halal economic sector ilalom sa “new normal”.
Uban ang tema nga “Resilience in the New Normal: The Impact of Halal Economy Worldwide”, ang nahisgutan nga expo magsugod sa May 27, 2022 hangtud May 29, 2022 sa Abreeza Ayala Business Park.
Kalakip sab sa maong aktibidad ang panaghisgut kung paunsa mapalambo ang bag-ong standard tali sa local ug international Halal economy sama sa local perspective sa Halal trade ug tourism diin musaysay niini ang mga representante gikan sa Department of Tourism (DOT) ug uban pang kabahin sa aktibidad.
Una na sab nga gibutyag ni Marilou Ampuan, vice chairperson sa Regional Halal Committee, anaa sa 100 local ug international participants ingon man guests ang laoman nga mamahimong kabahin niini.
Gikatakda sab nga ilusad sa maong expo ang Memorandum Circular 2020-010 Guidelines nga mogiya sa operasyon ug recognition sa mga Muslim-friendly accommodations ug establishments.
Ilusad sab ang Halal Research Ecosystem alang Development and Innovations (REDI) Tourism Program.
