Gisugdan sa makahuluganon nga paagi ang National Women’s Month 2026 sa 10th Infantry (Agila) Division pinaagi sa Flag Raising Ceremony niadtong Lunes, 02 Marso 2026, sa Camp General Manuel T. Yan Sr., Barangay Tuboran,Mawab diin gipasiugda ang pagsul-ob sa ranggo sa baynte-singko (25) ka bag-ong napromotar nga mga opisyal ug ang pagselebrar sa mahinungdanong papel sa kababayen-an sa Armed Forces of the Philippines (AFP).
Sa maong seremonya, lima (5) ka opisyal ang napromotar ngadto sa Major ug baynte (20) ngadto sa Captain, nga matag usa pormal nga nadawat ang ilang bag-ong insignia usa ka simbolo sa mas dako nga responsibilidad, mas taas nga mga gilauman, ug mas lawom nga dedikasyon sa serbisyo.
Talagsaon ang kahigayunan nga adunay pito (7) sa mga bag-ong napromotar nga opisyal mga kababayen-an, nga nagpakita sa nagtubo nga papel sa liderato sa kababayen-an sulod sa dibisyon ug nagpakita sa padayon nga pagpaningkamot sa Army alang sa gender equality ug inklusibong pag-uswag.
Gibasa ang mensahe ni General Romeo Brawner Jr., ni Major General Alvin Luzon, Kumander sa 10ID, diin gihisgutan niini ang integridad ug kontribusyon sa mga kababayen-an nga mga sundalo sa AFP.
Ang doble nga selebrasyon nagpasabot sa dedikasyon sa AFP sa gender equality, propesyonal nga pagtubo, ug kahandaan sa misyon. Ang tema sa Women’s Month 2026 nagpadayag sa padayon nga pag-ila sa Philippine Army sa mahinungdanong papel sa kababayen-an ug sa pag-amuma sa liderato sa tanang lebel.
Samtang ang Philippine Army nagpadayon sa pag-ila sa “vital” nga papel sa kababayen-an ug sa pagpasiugda sa liderato, ang 10th Infantry Division nagpadayag nga ang propesyonal nga kaayo walay kalabotan kini sa gender, ang oportunidad, kompetensya, ug dedikasyon mao ang marka sa matag Pilipinong sundalo.
