Giluwas ang pito ka mga magtutudlong Pilipino sa Anchorage, Alaska gumikan kay nasunog ang ilahang tulunghaan sa St. Michael Island sa Stebbins.
Matod pa sa mga nakasaksi, nakadungog sila ug pagbusikad ug pagkahoman misunod ang kalayo sa nahisgutang school building. Subay sa pasi-unang imbestigasyon sa mga awtoridad, nagsugod ang sunog sa boiler room.
Gisulayan pa sa mga magtutudlong Pilipino nga makontrola ang sunog ginamit ang fire extinguishers, apan dali nga mikuyanap ang kalayo gumikan sa makusog nga hangin sa lugar.
Nasunog ang siyam ka mga school district buildings lakip na ang gipuy-an sa pito ka mga Filipino teachers nga nagtudlo sa nahisgutang lugar.
Walay nasalbar nga gamit ang pito ka mga magtutudlong Pilipino apan gihatagan ang mga nahisgutan ug financial support.
Samtang gipatuman na usab ni Alaska Governor Mike Dunleavy ang public assistance program sa estado aron matabangan ang mga apektado ug mapabarog dayon ang school buildings, nga mao lamang ang educational facilities sa mga komunidad sa isla.
