DAVAO CITY- Daghanang ihap sa mga ginikanan ug mga kabatan-onan sa unang distrito ning syudad ang nakabenepisyo sa pipila ka mga libreng serbisyo nga gitanyag sa Local Council for the Protection of Children (LCPC) sa Rizal Park kagahapong adlawa.

Lakip sa mga serbisyong gitanyag ang nutritional assessment, dental services, mosquito repellants gikan sa City Health Office, libreng seedlings gikan sa City Agriculturist Office, registration services gikan sa Local Civil Registrar, information and education materials, ug advocacy materials gikan sa nagkadaiyang mga stakeholders.

Gikanayon ni Consorcia B. Ronquillo, hepe sa Davao City Special Office for Children Concerns, nga dako ang ilang kalipay gumikan human sa duha ka tuig nga pandemya, subli na usab nga gipahigayon ang Serbisyo Caravan Para sa Pamilya ug Kabataan pinaagi sa face-to-face program.

Ang month-long activities alang sa National Children’s Month ang naglangkub sa Serbisyo Caravan Para sa Pamilya diin ipahigayon sab kini sa umaabot nga Nobyembre 18 sa Buhangin Gym ug sa Nobyembre 29 sa Crossing Bayabas Toril Gym.