DAVAO CITY- Kasamtangang nagpahigayon og imbestigasyon ang Police Regional Office (PRO) 11 kalabot sa pagkamatay sa usa ka police trainee atol sa Basic Internal Security Operations Course (BISOC).
Sa pakighinabi sa Bombo Radyo Davao kang Pmaj. Eudisan P. Gultiano, bag-ong tigpamaba sa PRO 11, gibutyag niini nga kasamtangang nagpahigayon karon og imbestigasyon ang kapulisan kung posible bang adunay mga lapses sa kabahin sa mga doktor apan sa karon ginapaabot pa nila ang resulta sa maong imbestigasyon aron nga kung ugaling aduna gayuy lapses sa maong training program, tukmang criminal charges ang ipasaka batok sa mga instructors o sa mga training personnel.
Kahinumduman nga nakabsan sa kinabuhi si Patrolman Angelo Tito samtang mipailalom kini sa iyang BISOC training sa Regional Special Training Unit (RSTU) Davao.
Kahinumduman nga niadtong Huwebes, Enero 16, nakuyapan si Tito atol sa usa ka road run alas 4:30 sa hapon sa Sun City Subdivision sa Barangay Komunal ning dakbayan sa Davao ug nakabsan kini sa kinabuhi alas 10:30 sa buntag niadtong Enero 17 sa Metro Davao Medical And Research Center diin na-diagnosed kini og Sinus Tachycardia Secondary to Severe Dehydration o Heat Stroke.
