DAVAO CITY – Kapin sa 60 ka mga balay ang naugdaw sa sunog sa Purok Sto Nino, Brgy Leon Garcia Agdao ning dakbayan sa Dabaw.
Apil usab sa nasunog ang Building 2 sa Congressman Manuel Garcia Elementary School.
Gikanayon Marie Jean Namoco, teacher 2 ug sa samang higayon DepEd School DRRM Coordinator sa Cong. Manuel Garcia Elementary School, totally damage ang 4 ka mga classrooms sa second floor sa tulunghaan, samtang partially damage usab ang lain pang 4 ka mga classrooms sa ubos nga bahin sa school building.
Lakip usab sa mga nasunod ang tanang mga modules sa mga estudyante, photo copier machine, mga school records sa mga tinun-an, gibana-banang 20 ka mga bag-ong computers, mga electric fan, ceiling fan, mga libro, mga personal nga gamit sa mga maestra ug uban pang mga gamit sa tulunghaan.
Sumala ni Namoco, gisulayan pa nila ang pagkuha sa mga gamit sa tulunghaan apan kusog na kaayo ang kalayo hinungdan nga wala na sila gitugutan pa sa mga bomber nga makasulod sa lugar.
Gikanayon usab sa lain pang magtutudlo nga si Sheila Marie Guisihan, dali usab sumala pang gipahibalo ang school principal ug ang district supervisor sa nahisgutang panghitabo ug sa mga damyos nga naangkon sa tulunghaan.
Samtang, balhug na sa prisuhan si Robert Mananlong, 44 anyos human miangkon nga siya ang responsable sa nahitabong sunog.
Sumala pa ni Mananlong, kalit na lamang siyang nakamata pasado ala una kaganinang kaadlawon, apan wala siya masayud kung nganong iya kining nahimo, hinuon giangkon niini nga mikuha siya ug gapas ug gibutangan kini ug krudo dayong gisindihan ug lighter.
Giandam na usab sa kapulisan ang kasong Arson nga ipasaka batok kang Mananlong kinsa walay piyansa nga gitagana alang sa temporaryong kagawasan niini.
