DAVAO CITY – Luyo sa gipahugtan nga kampanya nga gipahigayon sa mga nagkadaiyang stakeholders karong tuiga isip kabahin sa pag-obserba sa Fire Prevention Month, kinatibuk-ang 60 ka mga sunog ang natala dinhi sa siyudad karong Marso.
Sumala pa kang Senior Fire Officer (SFO) 2 Ramil Gillado, BFP-11 spokesperson, nga adunay dyutay nga pagsaka sa ihap sa mga sunog kung itandi sa bulan sa Marso sa milabay nga tuig nga anaa lamang sa 52.
Mukabat sab sa P3 milyon nga kantidad sa propedad ang nadaut apan gitino niini nga ang kinatibuk-ang danyos ang mas ubos kung itandi sa P6 milyon nga natala sa susamang bulan sa milabay nga tuig.
Sagad sumala pa sa sunog karong Marso ang gilangkuban sa grass fires, residential ug rubbish fires.
Pipila sa mga gitudlong tinubdan niini ang paglabay sa mga sigarilyo, bonfires ug gipasagdan nga pagsunog ug mga basura. Samtang ang mga sunog sa residential areas mamahimong hinungdan sumala pa sa electrical short circuit, electrical arcing, nag-overheat nga mga electrical appliances, ingon man napasagdan nga niluto ug mga bata nga nagdula ug posporo o lighters.
