Nakuratan ang mga tawo sa usa ka videoke bar sa Lapu-Lapu Superhighway, Barangay Aplaya, Digos City, Davao del Sur human makit-ang wala nay kinabuhi ang usa ka 59-anyos nga lalaki sulod sa usa ka VIP room kaganinang kadlawon.
Giila ang biktima nga si Margarito Dagatan Condiman, minyo, usa ka tricycle driver ug residente sa Lower Matti, Digos City.
Sumala sa inisyal nga imbestigasyon sa kapulisan, mihapit una ang lalaki sa maong establisyemento aron mokaon.
Human niini, mipangayo kini og higayon nga mopahulay ug dayon misulod sa usa ka private room sa videoke bar.
Pipila ka minutos ang milabay, naalarma ang caretaker ug pipila ka entertainers sa lugar human makadungog og kusog nga kasaba gikan sa VIP room.
Sa ilang pagsusi, didto nila nakit-an ang biktima nga nagkalisod ug gituohang gikombulsyon.
Dali dayong nangayo og tabang ang usa ka concerned customer ug gipahibalo ang mga otoridad.
Bisan pa sa paspas nga pagresponde, gideklarar nga wala nay kinabuhi ang biktima sa pag-abot sa mga responder.
Base sa unang pagsusi sa lawas sa namatay, giingon sa kapulisan nga wala silay nakita nga timailhan sa foul play.
Gituohang atake sa kasingkasing ang hinungdan sa kalit nga pagkamatay sa biktima.
Sa pagkakaron, anaa na ang patayng lawas ni Condiman sa Padilla Funeral Home sa Barangay Aplaya, Digos City alang sa hustong pagpahiluna, samtang padayon ang documentation sa kapulisan kabahin sa insidente.
