Arestado ang 5 ka mga estudyante sa Puerto Princesa City Police Office human nga nabistong namaligya og sahog sa sigarilyong “Thuoc Lao” o Tuklaw.
Sa gikasang operasyon sa otoridad ngadto na sa Barangay San Miguel sa palawan, nakumpiska ang 10 ka mga paket sa ginatuohang ‘tsongke’ nga dunay gibug-aton nga 14.3 grams lakip na ang usa ka sachet, 3 ka glass tubes sa synthetic cannabinoid nga napalit sa mga suspek, ug 9 ka plastic bottle sa ginatuohang synthetic cannabinoid, 10 ka disposable sa hiringilya, usa ka disposable syringe nga dunay sulod nga synthetic cannabinoid, water pipe, buy-bust money nga mibalor og P2,500 ug upat ka cellphones.
Subay sa rekord, giila ang mga dinakpan nga mao sila alyas Tong-tong, 19 anyos, alyas John, 24 anyos, mga residente sa Barangay San Miguel; alyas Rick, 19 anyos, alyas Stev nga 25 anyos ug namuyo sa Barangay San Manuel ug alyas Anjo, 22 anyos, residente sa Brgy. San Pedro Puerto Princesa City.
Gumikan niini, mas gipahugtan pa karon sa otoridad ang ilang operasyon aron batukan ang naghitak nga produksiyon sa tuklaw o black cigarette human nga pipila ka mga batan-on ang nagkirig-kirig ug nanggahi nga daw ‘zombie’.
