DAVAO CITY – Lima ka mga balay ang nangaguba human ma-igo sa kusog nga hangin sa Lupon, Davao Oriental pasado alas 8 kaganinang buntag.
Gikanayon sa Lupon Municipal Disaster Risk Reduction and management office, nakasinati ang mga residente ug dili tiaw nga kakusog sa hangin nga daw ipo-ipo hinungdan sa pagkatumba sa pipila ka mga punuan sa lubi ug mga kahoy nga naagian niini sa Clado Subdivision ug Barangay PObalcion, LUpon, Davao Oriental.
Sumala sa mga residente, una nilang nakita ang baga ug itom kaayo nga panganod sa kalangitan, ug inanay kining na-porma sumala pa ug buhawi.
Gumikan sa ka-kusog sa hangin nga nagtuyook-tuyok sa lugar, pipila ka mga kabalayan ang nanga-damyos human nadat-ugan sa mga punuan sa kahoy ug lubi nga nangatumba.
Tungod sa grabe ka kusog sa hangin, nangalukat usab ang mga punuan sa mangga ug saging.
Dungan sa pag-igo sa naghaguros nga ipo-ipo ang pagbundak usab sa grabe ka-kusog nga ulan sa nahisgutang lugar. Labot niini, nanawagan ang MDRRMO sa Lupon ngadto sa katawhan nga mag-amping ug magbinantayon gumikan na usab sa dili maayo nga kahimtang sa panahon.
