DAVAO CITY – Lima ka mga Barangay officials sa Davao region ang gipailalom karon sa six-month preventive suspension sa Office of the Ombudsman human ang gidusong reklamo sa Department of the Interior and Local Government (DILG) batok sa mga nahisgutan gumikan sa anomalya ug irregularidad nga gikalambigitan dungan sa pagpatuman sa first tranche sa Social Amelioration Program (SAP).
Sa gipagulang pahayag sa DILG, naila ang mga nahisgutang barangay kapitan nga sila si Maria T. Te sa Barangay Manuel Roxas, Governor Generoso, Davao Oriental; Josephina Padillo sa Barangay Libertad, Bansalan, Davao del Sur; Aurora C. Benemerito sa Barangay Bangkal, Matanao, Davao del Sur; Noel V. Alo sa Barangay Mayo, Mati City , Davao Oriental; ug Apolonio Toledo sa Barangay Harada Butal, Padada, Davao del Sur.
Sumala pa kang DILG Secretary Eduardo Año, gimandoan gilayon ang mga municipal ug city mayors nga sakop ang nahisgutan nga barangay officials nga ipatuman ang kamandoan sa Ombudsman samtang ang DILG Regional ug field officers maoy motutok aron masigurong mapatuman ang mass suspension.
Gibutyag sab ni DILG-Davao Director Alex Roldan nga ang lima ka mga barangay kapitan ang temporaryo nga gisuspende aron nga mahatagan ug dalan ang gipahigayon nga imbestigasyon kalabot sa alegasyon nga reklamo batok kanila.
Hinuon gitino sa opisyal nga wala pa gitangtang ang mga nahisgutan sa ilang posisyon. Una ng gi-anunsiyo sa DILG nga anaa sa 24 local elected ug appointed public officials sa Davao Region ingon man ang ilang civilian co-conspirators ang kasamtangan giimbestigahan kalabot sa gikanayong anomalya sa pay-outs sa SAP.
