Gikatahong anaa sa 6,970 ka mga identified target households ang makadawat sa First 1000 Days conditional cash grant kon F1KD program sulod sa rehiyon sa Davao nga inisyatiba sa Department of Social Welfare (DSWD).
Ang F1KD usa ka programa ilawom sa Pantawid Pamilyang Pilipino Program (4Ps) diin gilayon niining tabangan ang hingpit nga kabos nga mga pamilya alang mapadako og tarong ang mga anak niini sulod sa unang 1000 ka adlaw.
Sumala pa ni DSWD XI 4Ps Division Chief Margie Cabido-Sobretodo, nga ang prayoridad sa F1KD mao ang mga miyembro usab sa 4Ps.
Partikular niini katong mga mabdus o katong aduna nay mga anak nga nag edad 2-anyos paubos.
Dugang pa sa opisyal, nga pinaagi sa F1KD conditional cash grant makadawat og P350 matag bulan ang maong mga benepisyaryo.
Giawhag usab ni Cabido-Sobretodo, nga mamahimong i-update sa mga benepisyaryo ang maong mga profile niini ug gilayon nga mag-apply sa bag-ohay lamang niini nga online self-service platform nga “i-Registro ang F1KD sa 4Ps”.
Gani, kalakip sa mga kondisyon usab aron nga mahilakip sa maong cash grant kinahanglang musumite usab ngadto sa maong platform og dokumentong nagpamatuod nga kompleto sa pre-natal ug post natal care ang usa ka mabdus.
Samtang, kun ogaling manganak na kinahanglang sulod kini sa maong beripikadong ospital ug mamahimong kompleto usab ang bata nga nag edad 2-anyos paubos sa gikinahanglang mga vaccine niini.
Sa pagka karon, gikanayon ni Cabido-Sobretodo, nga nakahatag na og inisyal nga cash grant ang DSWD ngadto sa mga benepisyaryo niini sugod kaniadtong katapusang semana sa Enero nga mulungtad usab sa ikaduhang semana sa Pebrero.
Padayon usab ang monitoring ngadto sa mga benepisyaryo human sa giingong mga bulan aron nga masegurong mi-comply kini sa maong mga regulasyon.
