DAVAO CITY – Upat na ka mga mayor sa Davao Region ang nagpositibo sa COVID-19 sukad niadtong bulan sa Oktobre ning tuig kasamtangan.
Pinaka-ulahi niini mao si Monkayo Mayor Ramil Gentugaya.
Sa iyang social media account, gibutyag ni Gentugaya nga nakasinati siya og pag-ubo ug pagkalintura hinungdan nga mipa-ilalom dayon sa RT-PCR test kauban ang iyang asawa nga si Vice Mayor Joanna Gentugaya ug napamatud-an nga positibo siya sa COVID-19 samtang negatibo hinuon ang besi mayor.
Tungod niini, nanawagan si Gentugaya sa mga tawo nga iyang gikahimamat nga mag self isolate ug kung adunay bationg mga sintomas, makig-alayon dayon sa Barangay Health Emergency Response Team (BHERT).
Luyo sa iyang kahimtang karon, gipasalig ni Mayor Gentugaya nga nagpabilin siyang lig-on ug mihangyo og pag-ampo sa katawhan alang sa iyang hinanaling kaayuhan.
Kahinumduman nga nag-positibo usab sa COVID-19 ang lain pang tulo ka mga mayor sa Davao region nga sila Sto. Tomas Davao del Norte Mayor Ernesto Evangelista; Laak, Davao de Oro Mayor Antonio Libuangan; Montevista, Davao de Oro Mayor Eutropio Jayectin asawa ug anak niini.
