DAVAO CITY – Mukabat na sa 4 ka mga pasyente sa Southern Philippines Medical Center (SPMC) ang namatay tungod sa sakit nga dengue sulod lamang karong bulan sa Hulyo ning kasamtangan nga tuig.
Sumala pa kang Erlinda Wayno, Assistant chief nurse sa inspection, prevention and control unit sa SPMC, nga sa nahisgutan nga ihap duruha niini ang taga dakbayan sa Davao samtang tig-usa ang gikan sa Samal ug Compostela Valley.
Nasayran nga sa unang quarter ning kasamtangan nga tuig, mukabat 350 ka mga pasyente nga adunay dengue ang natala diin pinakataas niini ang sa bulan sa Enero nga adunay 155. Samtang sa second quarter, natala na karon ug 340 diin sa bulan sa Hunyo anaa sa 202 ang nagka-dengue.
Gikanayon sab ni Wayno nga anaa sa 15 ngadto 20 ka mga pasyente ang madala sa balay tambalanan matag adlaw.
Kini sumala pa ang rason nga naghuot karon ang pasyente sa SPMC nga gipang-admit tungod sa nahisgutan nga balatian ug nagkulang na sab ang mga katre.
Ubay-ubay sab sa mga Barangay sa siyudad ang nakatala ug taas nga kaso sa dengue hinungdan nga padayon ang panawagan karon sa lokal nga panggamhanan nga batasanon ang pagpanglimpiyo sa palibot ilabi na kadtong mga breeding site sa lamok.
