Nakatala ang India og upat ka bag-ong kaso sa mga namatay gumikan sa pagsaka sa Covid-19 niadtong adlawong Lunes, sumala pa sa pinakabag-ong report sa Ministry of Health.
Sumala pa, nga anaa sa 203 ang nadugang nga mga positibo sa virus sulod lamang sa 24 ka oras, hinungdan nga misaka na sa 3,961 ang kinatibuk-ang ihap sa mga natapnan sa Covid-19.
Sa pagbana-bana sa Indian Council of Medical Research (ICMR), nga kadaghanan sumala pa sa mga kaso maoy gituohang resulta sa mga Omicron sub-variants ug nagpabiling “mild” lamang ang mga sintomas.
Gipahibalo usab ang publiko nga wala pa’y angay kabalak-an sa pagka-karon.
Bisan pa man niini, gisiguro ni Health Minister Prataprao Jadhav nga andam na ang gobyerno ugaling mosamot ang maong sitwasyon.
Subay sa datos sa Worldometer, kapin sa 45 milyon ka mga kaso sa Covid-19 ang narekord sa India sukad pa niadtong pagsugod sa pandemya sa tuig 2020, diin 533,570 niini ang kumpirmadong nangamatay gumikan sa maong sakit.
