Nagsabay nga nagfile ang upat ka mga Duterte kagahapong adlawa atol sa ikapitong adlaw sa filing of certificate of candidacy.
Gani, daw dili mahulugan og karayom kon gidagsa og daghanang supporters ang Commission on Elections XI sa dihang miabot si kanhi Pang. Rodrigo Duterte gahapon.
Kahinumdumang gianunsiyo ni FPRRD ang niadtong milabayng adlawng Sabado nga subli kining magpapili isip mayor sa Davao City ug ang running mate niini, mao ang iyang anak nga si incumbent Davao City Mayor Sebastian ‘Baste’ Duterte ug magpapili isip bise-mayor.
Nagfile si Cong. Paolo Duterte pinaagi sa iyang abogado nga si Atty. Elija Pepito aron subling magpapili isip Congressman sa 1st District ning dakbayan, samtang si incumbent kapitan sa Barangay Buhangin Omar Duterte, magpapili isip Congressman sa 2nd District aron matud pa atbangan ang pamilyang Garcia nga wala matud pay pildi-pildi pinaagi ni Coun. Javi Campos III.
Sa pikas bahin, gibutyag ni Mayor Baste nga nalipay kini gumikan duna matud pay ikabuga ug ikadalit ang iyang amahan sa dakbayan.
Dako sab ang pagtuo niini nga nahimo sab malipayon ang mga Dabawenyo gumikan sa pagbalik ni FPRRD dinhi sa dakbayan.
Sa laing bahin, mikasa sa hagit sa iyang followers ang social media content creator nga si ‘Boy Isog’ kon Roweno Caballes sa tinuod kinabuhi nga atbangan ang Duterte-Duterte tandem ug mudagan isip mayor sa dakbayan gumikan sab matud pa naglaom kining makalingkod sa isip mayor sa Dabaw ug usa matod pa kini sa iyahang mga pangandoy.
