Wala pay matumbok nga rason ang kabanay sa usa ka 39 anyos nga babaye kung nganong nakadesisyon kini nga tapuson na lamang ang iyang kinabuhi pinaagi sa pag-inom ug insecticide.
Kahinumduman nga nahitabo ang insidente sa Purok 2, Tagbaros, sa Maco, Compostela Valley.
Naila ang biktima nga si Annaliza Hermosa Hiyan, walay trabaho ug residente sa nahisgutan nga dapit.
Gikanayong igo na lamang nga nagpatala ang kapuyo sa biktima nga si Rico Betonio Barillo, 40-anyos ug pag-umangkon nga si Edralyn Giyan Baguio, 30-anyos ngadto sa Compostela Valley Provincial Police Office human nga ilang naabtan nga wala nay kinabuhi ang biktima.
Sumala pa kang Rico, nahinanok siya ug tulog apan dihang nakamata bandang alas dies sa gabii nakita niini ang kapuyo nga nakirig ug nagbula-bula na ang baba.
Gikanayong wala nagdugay ang biktima ug nakutloan gilayon kini sa iyang kinabuhi.
Namatikdan ni Rico ang sudlanan sa insecticide ug dunay plastik nga adunay tubig nga gisagulan sa insecticide.
Padayon karon nga giimbestigahan sa kapulisan ang maong insidente samtang ang patay’ng lawas sa biktima ang gihaya sa ilang pinuy-anan.
