DAVAO CITY – Dako ang pagpasalamat ug gipasigarbo karon sa Police Regional Office (PRO) XI nga nahimong malampuson ug malinawon ang bag-ohay lamang natapos nga 37th Kadayawan Festival sa Davao.
Pinaagi sa kooperasyon ug partisipasyon sa PRO XI ug uban pang security forces sa Davao, lokal nga panggamhanan ug sa komunidad, nahimong generally peaceful ug hapsay ang usa ka semana nga kasaulogan sa Kadayawan Festival 2022.
Kahinumduman nga anaa sa 11,459 ka mga personahe gikan sa hut-ong sa kapulisan ug uban pang security cluster ang gipang-deploy aron masiguro ang luwas nga pagpahigayon og nagkadaiyang aktibidad nga gilangkuban sa iladong Pamulak Festival ug Indak-indak sa Kadalanan.
Dungan niini, nagpasalamat si PBGEN BENJAMIN SILO JR, Regional Director sa PRO XI, sa katawhang dabawenyo ingon man sa tanang mibisita gumikan sa ilang paghatag og walay puas nga pagsuporta nga maoy usa sa hinungdan nga nahimong luwas, hapsay ug malampuson ang kasaulogan sa Kadayawan.
