DAVAO CITY- Muabot sa 335 ka mga kanhi rebelde sukad niadtong 2016 ang na-enroll na ilalom sa Enhanced Comprehensive Local Integration Program (E-CLIP) ug giproseso sa Happy Home, usa ka halfway house ug processing center alang sa mga kanhi rebelde.
Subay niini, gipasidunggan ni Davao Oriental Governor Corazon Malanyaon ang pagpaningkamot sa Philippine Army ug tanang development partners nga maoy rason nganong nakab-ot ang kalambuan sa probinsya.
Matud pa sa gobernador nga maoy mismong nanguna sa pagpatukod sa Happy Home, karon ang saktong panahon sa pagdeklara sa kinatibuk-an sa Davao Oriental isip insurgency-free ilabi na nga gipakusgan karon sa probinsya ang turismo niini.
Dugang pa niini nga adunay dakong kapasidad ang probinsya sa Davao Oriental nga mahimong premier tourist destination ug angayan gayud nga bisitahon.
Apan kinahanglan sab nga i-konsidera nga ang pagpalambo sa industriya sa turismo sa usa ka lugar ang nakadepende usab sa peace and order situation niini.
