DAVAO CITY – Hugtanong gi-dili una sa pagka-karon ang pagbisita sa mga piniriso sa Toril Police Station ning dakbayan sa Dabaw.
Kini ang subay na usab sa gipatuman nga lockdown sa nahisgutang police station sugod karong adlawa.
Gikanayon ni Davao City Police Office Director Col. Kirby John Kraft, gipa-ilalom sa lockdown ang Toril PNP isip precautionary measures aron malikayan ang dugang pagtakod-takod sa makamatay nga virus.
Na-una nang gikompirma ni Dr Josephine Villafuerte, head sa city health office nga positibo sa covid 19 ang 30 ka mga piniriso sa Toril PNP.
Gikabutyag nga niadtong Oktobre 1 gipa-ilalom sa swab test ang 32 ka mga piniriso isip SOP una ibalhin sa Maa City Jail, apan migawas sa resulta nga 30 niini ang positibo.
Sa karon, gibutang na sa isolation facility sulod lamang sa Toril PNP ang mga piniriso ug hugot nga gimonitor sa mga doktor ang ilang kahimtang.
Gipasabot sa opisyal nga dili mamahimong dalon sa temporary treatment monitoring facility ang mga piniriso gumikan sa security risk, diin kinahanglan ug dugang pwersa sa kapulisan aron bantayan ang mga nahisgutan.
Sumala ni Police Major Michael Uyanguren hepe sa Toril PNP subling ipa-ilalom sa swab test ang mga nahisgutan human ang 14 ka adlaw ayha ibalhin sa city jail.
Gipa-ilalom na usab sa swab test ang mga sakop sa Toril PNP ug gilusad na usab ang contact tracing sa mga tawo nga mibisita sa mga piniriso.
