DAVAO CITY – Upat na ang natalang patay, 16 angol sa nahitabong aksidente sa Binugao Toril ning dakbayan sa dabaw pasado alas tres kagahapon sa hapon.
Kahinumduman nga nalambigit sa maong aksidente ang usa ka unit Mindanao Star ug usaka wing van nga puno ug mga kargamento. Halos tanan sa mga nahimong biktima ang naggikan sa Mindanao star bus.
Subay sa paghulagway, na-ibot ang pikas nga bongbong sa wing van ug napasok sa driver side sa Mindanao star nga posibling usa sa mga hinungdan sa pagka-angol sa mga pasahero.
Padayon pa usab ang gipahigayon nga imbestigasyon sa kapulisan kalabot sa maong insidente.
Pipila sa mga biktima ang na-discharge na sa hospital sa Southern Philippines Medical Center (SPMC) apan ubay-ubay sab sa mga biktima ang anaa sa talandugon nga kahimtang.
Usa sa mga on the spot nga namatay ang naila nga si Judy Mejares nga gipahimutang sa usa ka punerarya sa Toril ning dakbayan samtang duruha sab sumala pa ang nakabsan sa kinabuhi samtang gidala sa SPMC.
Sa pagpakighinabi sa Bomboradyo kang alyas Kim, gikumpirma niini nga kalakip sa namatay ang iyang inahan nga si Julita Tolin, 53 anyos, usa ka empleyado sa DSWD Monkayo Compostela Valley ug residente sa Purok 8 Poblacion sa nahisgutan nga dapit kini subay na sab pagkumpirma sa iyang igsuon samtang anaa sa SPMC.
Kalakip sab sa namatay ang bana sa ni Julita nga si Rodrigo Tolin kini sa base sa kumpirmasyon sa ospital. Gikan sumala pa sa Midsayap ang iyang mga ginikanan dihang nahitabo ang aksidente.
