Gilugos una sa suspek ayha gipatay ang usa ka 3-anyos nga bata sa Sitio Narra Brgy. Nuing, Jose Abad Santos, Davao Occidental, niadtong nakalabayng adlaw.
Subay sa gilusad nga inisyal nga imbestigasyon sa Jose Abad Santos PNP, giila ang biktima nga si alyas Mary, 3-anyos ang pangedaron samtang ang suspek sab nga nasayrang kaugalingong igsuon ra sab sa biktima nga si alyas Boyax, 17-anyos.
Sumala pa sa taho sa mga otoridad, hubog matud pa ang suspek sa dihang mipauli kini sa ilahang panimalay, rason nga naabtan lamang niini ang 3-anyos niyang igsuon og gilayon kini niyang gidala sa usa matud pa ka pugon sa kopras ug didto gihimo na niini ang pagpanglugos ngadto sa makaluluoy nga batang babaye.
Sumala pa sab sa mga nakakita nga mga residente, aduna sumala pa silay nadungog nga hilak sa usa ka bata nga daw nagpakitabang, apan sa dihang ilaha na kining gisusi, nakaplagan na nga wala nay bisti ug wala na sab kinabuhi ang maong batang babaye.
Sa maong lugar usab, nakita sab niini ang igsuon sa biktima nga nakasuot na lamang og underware ug nakatulog gumikan sa kahubog.
Dali sab nga girespondehan sa mga silingan ug mga otoridad ang maong panghitabo ug gidakop gilayon ang suspek.
Sumala pa sab sa nakuha nga mga ebidensya sa mga otoridad, gikumpirma niini nga gilugos ug gipatay gayud ang bata sa kaugalingon niining igsuon.
Dugang pa nga gikaingon nga nagsuyop sumala pa kini og droga ayha gibuhat ang maong krimen.
Sa karun, anaa na sa kostudiya sa kapulisan ang maong suspek alang sa tukmang disposisyon.
