Gihatagan og medical attention ang 29 ka estudyante sa Tulalian National High School sa Santo Tomas, Davao del Norte human makasinati og sakit sa tiyan, kasukaon, pagsuka ug pagkalipong niadtong Agosto 24.
Gituohang food poisoning ang hinungdan sa insidente, apan nagpadayon pa ang pagsusi sa local health authorities aron matino ang eksaktong gigikanan.
Gilayon nga gidala sa Municipal Health Office ang mga estudyante ngadto sa Municipal Health Center alang sa evaluation ug initial treatment.
Dugang pa, 18 ka estudyante ang gi-refer sa Davao del Norte Hospital–Carmen, upat ngadto sa Davao Regional Medical Center ug usa ngadto sa private hospital.
Unom ka estudyante ang clinically cleared human sa medical assessment.
Personal usab nga mibisita si Santo Tomas Mayor Roland S. Dejesica aron masuta ang kahimtang sa mga estudyante ug masiguro ang ilang pag-atiman.
Sa pagkakaron, gisusi sa health authorities ang school canteen ug nagpahigayon og food sample testing aron matino kung unsay hinungdan sa maong insidente. | VIA BOMBO EROS PAJOTA
