DAVAO CITY – (UPDATE) Gipaabot na lamang karon sa Municipal Health Office sa lungsod sa Laak Davao de Oro ang resulta sa gikuha nga water sample gikan sa tangke nga tinubdan sa tubig sa mga residente sa duha ka mga Purok sa Barangay Naga sa maong lungsod.
Gikanayon ni Dr Julius Remolla, ang Laak Municipal Health Officer, nagkuha na kagahapon ug water samples ang Department of Health aron masayran kung unsa ang hinungdan sa nasiantiang diarrhea outbreak sa mga residente sa maong barangay nga miresulta sa kamatayon sa 3 ka mga tawo ug pagka-ospital karon sa 25 ka mga residente.
Dugang pa ni Dr Remolla nga sa kasamtangan, wala na nadugangan ang ihap sa 3 ka mga namatay gumikan sa severe dehydration nga nailhan nga sila Teodor Superales 66 anyos, Roland Cordova 32 anyos ug Marte Onnggao 66 anyos pulos residente sa Brgy Naga Laak Davao de Oro.
Gipahimutang na usab karon sa lokal nga kagamhanan sa Laak ang usaka water tank nga adunay unod nga 2,000 leters sa tubig aron magamit sa mga residente human temporaryo una nga gidili ang paggamit sa water reservoir nga gituohang maoy hinungndan sa pagkasakit sa mga residente.
Gituohan nga nasudlan ug tubig baha ang tangke nga maoy hinungdan sa pagkasakit sa mga residente. Samtang, gipa-ilalom na usab sa state of emergency ang maong barangay aron magamit ang pundo sa barangay sa pagtubag sa mga panginahanglanon sa mga biktima sa outbrrak.
