DAVAO CITY – Miabot na sa upat ang natalang patay gumikan sa Diarrhea Outbreak sa Toril District.
Kini human gikumpirma ni Davao City Health Officer Dr. Ashley Lopez nga usa ka 23 anyos nga health care worker nga swabber sa Davao CHO ang nadugang sa casualty sa outbreak.
Subay sa gihimong imbestigasyon sa buhatan, nakakaon matud pa og tapioca ang pasyente niadtong Hulyo 15 ayha kini nakasinati og sintomas sa diarrhea hinungdan nga gidala gilayon kini sa balay tambalanan niadtong Hulyo 16.
Human sa duha ka adlaw, namugos matud pa ang pasyente nga mupauli na ug sa balay na lamang ipadayon ang medication, apan pila ka adlaw niana, gibalik kini sa balay tambalanan human nga wala nagmaayo ang kahimtang niini.
Nasayran nga kagahapon, Hulyo 24, 2022, kabsan sa kinabuhi ang pasyente gumikan sa severe dehydration.
Kahinumduman, unang natala ang 3 ka casualty diin gilangkuban kini sa usa ka 10 anyos nga batang lalaki , 67 anyos nga lola, ug 32 anyos nga lalaki kinsa usa ka magtutudlo sa St. Peters College of Toril.
Sa kasamtangan, padayong ginaimbestigahan sa otoridad ang hinungdan sa outbreak diin aduna sab duha ka ice plant sa Toril ang kasamtangang gipasirad-an gumikan nakitaan og kagaw ang tinubdan sa ice niini ug nasayran nga ang duha ka ice plant mao ang ginakuhaan sa mga street food vendors.
Via || Hana Rallos
