Mokabat sa 22 ka mga indibidwal ang nakaangkon ug mga bun-og ug pangos sa kalawasan human sa nahitabo nga pagbaha ug pagdahili sa yuta gumikan sa kusog nga pagbundak sa ulan tungod sa nagpadayon nga epekto sa Intertropical Convergence Zone (ITCZ) sa pipila ka bahin dinhi sa Davao region.
Subay sa report gikan sa Office of Civil Defense-Davao Region, sa kinatibuk-an nga ihap, adunay duha ka mga indibidwal ang nagpabilin nga missing.
Dugang pa sa ahensya nga adunay tulo ka mga lugar sa Davao Occidental, Davao del Sur, ug Davao Oriental ang apektado human nga nakasinati ug mga pagbaha niadtong December 26, 2024.
Samtang gibana-banaan usab nga mokabat sa 13,979 ka mga katawhan, kon 3,446 ka mga pamilya ang naapektuhan sa daot nga panahon.
Kini nga ihap, 30 ka mga pamilya kon (133 individuals) ang wala sa mga evacuation centers (ECs), samtang ang 816 ka mga pamilya kon (3,448 individuals) ang anaa sa mga evacuation centers.
Sa karon padayon ang pakig-alayon sa nasampit nga ahensya alang sa hinabang ug seguridad sa mga residente.
Niadtong nakalbay nga mga semana una ng gibutyag sa Philippine Atmospheric, Geophysical and Astronomical Services Administration kon (Pagasa) nga ang ITCZ ug northeast monsoon kon Amihan ang padayon nga makaapekto sa dakong bahin sa nasud ilabi dinhi sa Mindanao.
Nagpahimangno usab kini sa mga posibilidad sa kalit nga pagbaha ug pagdahili sa yuta gumikan sa mga pag-ulan.
