DAVAO CITY – Gikustodiya na ang usa ka 21 anyos nga dalaga human nga nadakpan sa usa ka entrapment operation gumikan sa gihimong pagbugaw niini sa usa ka menor de edad nga babae sa Digos City.
Giila ang suspek nga si Jovy Lucero Crispino nga nadakpan sulod sa Galors Restaurant and Inn sa may Lim Ext. Brgy. San Miguel Digos City.
Gidakop ang nasangpit nga suspek human nga dunay mireport ngadto sa mga otoridad mahitungod sa iligal nga binuhatan niini.
Gilusad gilayon sa Philippine National Police Digos City kauban ang City Social Welfare and Development Office ang usa ka entrapment operation.
Nakuha gikan sa suspetsado ang P2,000 nga mark money ug cellphone nga gituohang gigamit sa maong transaksyon.
Narescue sab ang 16 anyos na batang babae nga mao ang gibugaw sa suspek bugti sa salapi nga ibayad sa ilang kustomer.
Mag-atubang karon ang suspek og kaso nga paglapas sa R.A. 7610 o Anti-Child Abuse Law ug R.A. 9208 o Anti-Trafficking in Persons Act of 2003.
