DAVAO CITY – Mikabat sa 20 ka mga barangay ang posible sumala pa nga maapektohan sa gikanayong proposed Waste-to-Energy (WTE) incineration facility dinhi sa dakbayan sa Davao, kini ang gibutyag sa environmental groups nga hugtanong mibabag sa maong proyekto dungan sa ilang gipahigayon nga protesta kagahapon.
Sumala pa kang Jill Banta, regional coordinator sa Plastic Free Pilipinas, nga posibleng maapektohan niini ang 20 ka mga barangay nga sakop sa District 1 ug District 3 nga gilangkuban sa Barangays Mintal, Sto. Niño, Tugbok, Langub, Waan, Callawa, Riverside, Balengaeng, Tacunan, Biao Guianga, Angalan, Los Amigos, Talandang, New Valencia, New Carmen, Matina Biao, Tagakpan, Ula, ug Catalunan Grande.
Gikanayong ang WTE facility nga planong itukod sa 10-hectare land sa Barangay Biao Escuela ang mamahimo sumala pa nga makaapekto sa kapin 3,000 ka mga residente kini pinaagi sa toxic emissions sama sa dioxins ug furans.
Suportado sumala pa nila ang nahimong pahayag ni Prof. Jorge Emmanuel nga nagkanayong ang WTE technology nga gamiton dinhi sa siyudad usa ka karaan nga klase sa technology nga walay katakos nga sunugon ang basura sa mas luwas nga temperatura.
Una na sab nga gibutyag ni konsehal Pamela Librado-Morata sa First Congressional District ning siyudad nga nabalaka siya kalabot sa proposed WTE project dungan sa pagbutyag nga miboto siya aron lamang kini ma-aprubahan.
