DAVAO REGION- Nasikop sa kapulisan ang 28-anyos nga si Dante Jay Sabdula Eleptiko,usa ka fish cage maintenance nga residente sa Upper Brgy Bagumbayan, Malalag Davao del Sur atol sa gikasang drug buy bust operation sa mga sakop sa Malalag MPS -MDEU, PDEU-PIU ug PDEA Davao del Sur.
Ang maong suspetsado ang nasikop kagahapon sa hapon sa Purok 4, Brgy Bagumbayan, Malalag Davao del Sur sa dihang napalitan kini siya sa nagpaka-aron-ingnong buyer og usa ka pakete sa gituuhang iligal nga droga kon shabu.
Atol sa maong pagrekisa sa indibidual, nakuhaan pa kini og lain pang pakete sa gituuhang iligal nga droga kon shabu lakip na usab ang gigamit nga buy bust money.
Sa kinatibuk-an nasakmit gikan sa maong suspetsado ang punto singkwentay singko (0.55) gramos sa gituuhang shabu ug gibana-banaang anaa kini street market value nga P5,500.
Samtang sa pikas bahin, nasikop sa kapulisan sa Los Amigos Police Station ning milabayng adlaw, ang usa ka traysikol drayber nga giilang si alyas “Migo”, 55-anyos nga residente sa Purok 6, Brgy. Los Amigos, Tugbok District ning dakbayan sa Davao.
Nasikop ang maong suspetsado atol sa gikasang drug buy bust operation diin napalitan kini siya og gituuhang iligal nga droga kon shabu nga ginabana-banaang nagkantidad og otso mil pesos.
Ning kasamtangan ginahan-ay na sa mga otoridad ang paga-atubangong kaso sa maong mga dinakpan nga adunay kalabutan sa pagsupak sa Republic Act 9165 kon Comprehensive Dangerous Act kon 2002.
