DAVAO CITY – Duruha ka mga firecracker-related injuries sa Davao Region ang natala sa Department of Health (DOH) Davao sukad Disyembre 21, 2019, hangtud January 2, 2020.
Sumala pa kang DOH Davao director Dr. Annabelle Yumang, nakadawat sila og report nga duruha ka mga indibidwal ang nakaangkon og injuries sa area sa Davao del Norte ug Davao del Sur.
Hinuon ubos sumala pa ang maong ihap kung itandi sa pito ka mga kaso sukad Disyembre 21, 2018, hangtud Enero 5, 2019.
Gikanayong ang 7 anyos nga taga Talaingod, Davao del Norte ang dali nga gidala sa Davao Regional Medical Center (DRMC) kaniadtong Disyembre 24 human nga nasamad tungod sa bamboo canon.
Nagbaton sumala pa og conjunctival abrasion sa iyang wala nga mata ang biktima.
Samtang kaniadtong Enero 1, 2020, usa ka 33 anyos nga lalaki sa Digos City ang nakaangkon og injury human nga nabuthan sa Roman Candle sa Barangay Igpit, Digos City.
Nakaangkon sumala pa kini og injury sa iyang tuo nga kamut ug dali nga gidala sa Digos Doctors Hospital.
Samtang gitino sab ni Southern Philippines Medical Center (SPMC) Chief of Clinics and Health Emergency Management Bureau (HEMB) coordinator Dr. Ricardo Audan nga atol sa pagtagbo sa bag-ong tuig, wala sila nakadawat og impormasyon nga adunay pasyente nga taga Davao nga nakaangkon og firecracker-related injuries sa iyang lawas.
Gikanayong kapin usa ka dekada na nga namentina sa dakbayan ang zero firecracker-related injuries gawas lamang sa mga kasikbit nga lugar sama sa Samal Island and Digos City.
