DAVAO DEL NORTE – Gikondena sa PNP IGACOS ang walay kaluoy nga gihimong pagpatay sa Samal Island.
Kini ang gipaguwa nga pamahayag sa kapilisan sa Island Garden City of Samal gumikan sa kamatayon sa duha ka mga menor de edad human nga gidungan sa pagpatay pinaagi sa pagpusil samtang anaa kini sulod sa Computer Shop sa Purok 3, Brgy. Camudmud. Babak Dist. Island Garden City of Samal.
Sumala pa sa kapulisan nga ilaha karon nga gipalawman ang imbistigasyon aron nga masayran ang posibling motibo sa maong panghitabo ingon man nga maila kung si kinsa ang mga mamumuno.
Gipasalig sab niini nga mopasaka ug kaso sa mga responsable sa krimen kung kini ang maila karong panahuna.
Samtang, gipadangat sab niini ang ilahang kasub-anan ngadto sa pamilya sa 14-anyos ug 17-anyos nga mga batan-on nga gipangpatay.
Sa karon gipanubayan na sa mga otoridad ang gisaysay sa mga nakasaksi sa maong pnaghitabo kabahin sa duha ka suspek nga nagsakay ug itom nga motorsiklo nga walay plate number nga nakita sa crime scene.
Samtang nanawagan karon ang kapulisan ngadto sa publiko sa pagtabang kanila nga kung adunay mga nasayran kabahin sa maong panghitabo gilayon nga i-report kanila pinaagi sa pagtawag sa mga numero nga 09429319998 ug 09632693167 alang sa kasulbaran sa maong krimen.
Gipasalig sab sa kapulisan sa mga informants ang suguridad niini ug pabilin nga itago ang ilahang pagkatawo.
