DAVAO CITY – Gi-asikaso na karon sa otoridad ang deporation sa duruha ka mga korean nationals nga una ng nasikop sa milabay nga semana sa gilusad nga drug busy bust operation.
Sumala pa kang Police Regional Office (PRO) 11 spokesperson Police Major Jason Baria, nakiglambigit na sila karon sa Bureau of Immigration ug Embassy of The Republic of Korea sa Manila alang sa pagpa-deport sa duruha ka mga langyaw nga suspetsado.
Una ng naila ang mga dinakpan nga sila si Minsoo Park, 43 anyos ug Keven Lee, 37 anyos, temporaryong nanimuyo sa Barangay Sto. Niño, Tugbok District.
Kahinumduman nga namaligya ang mga nahisgutan ug ginadili nga droga sa pulis nga nagpaka-arun ingnon nga buyer.
Sa kasamtangan, anaa sa kustodiya sa National Bureau of Investigation ang duruha ka mga langyaw ug nag-atubang ug kasong kalapasan sa Republic Act 9165 o Comprehensive Dangerous Drugs Act of 2002.
Nakuha sa ilang posisyon ang 3.5 grams sa gikatahapang shabu nga nagkantidad ug 15,000 pesos, buy-bust money nga kantidad sa 1,000 pesos ug sakyanan.
Gitataw ni Poilce Brig. Gen Marcelo Morales, PRO-Davao Regional Director, nga gipanid-an ang mga suspek sulod sa tulo ka bulan human nga nakadawat ang kapulisan ug tip gikan sa impormante kalabot sa mga illegal nga transaksiyon nga gihimo sa mga nahisgutan.
