Duha ka estudyante ang gikumpirmang patay, lakip ang giilang suspek sa pagpamusil sulod sa Ateneo de Zamboanga High School Campus niadtong Martes sa buntag, Agosto 18.
Sumala sa initial report sa Regional Director sa Police Regional Office 9, giila ang biktima nga si Patrick Dylan Wee, Grade 10 student, nga nakit-ang patay sa ikaupat nga andana sa campus.
Giila usab ang suspek nga si Mohammad Mael Jalani, Grade 9 student, nga mipusil sa kaugalingon sa ikalimang andana human sa insidente.
Base sa inisyal nga imbestigasyon, gipusil sa suspek ang mga estudyante sulod sa classroom pasado alas-7:50 sa buntag.
Gigamit niini ang usa ka pistol ug rifle.
Nagpadayon ang imbestigasyon sa RFU9-SOCO uban sa ZCPS 6, samtang gilunsad usab sa mga awtoridad ang parallel investigation aron matino ang background sa suspek, gigikanan ug legalidad sa mga armas, ug kung giunsa kini pagpasulod sa campus.
Gisusi usab kung adunay kapakyasan sa seguridad o pagpasagad sa bahin sa school administration nga may kalabotan sa insidente.
Sa pagkakaron, padayon pang gitino sa mga awtoridad ang motibo ug tibuok kahimtang nga mitultol sa maong pagpamusil.
