Nagpositibo sa paggamit iligal nga droga ang duha ka bus driver ug usa ka conductor atol sa usa ka surprise mandatory drug screening nga gihimo sa Land Transportation Office (LTO) XI ug Philippine Drug Enforcement Agency (PDEA) XI kagahapon sa buntag.
Ang drug testing kabahin sa “Oplan Byaheng Ayos: PASKO 2025” (Oplan Harabas), nga nagtumong sa seguridad sa mga pasahero sa panahon sa holiday rush.
Gikumpirma ni LTO XI operations chief Yuri Lim nga adunay 111 ka mga PUV drivers ug aides ang na-screen sa Davao City Overland Transport Terminal (DCOTT) ug sa Gaisano Mall of Davao van terminal.
Samtang ang van terminal wala’y nagpositibo nga resulta.
Ang inspeksyon sa DCOTT nakit-an nga duha ka drivers ug usa ka conductor ang positibo.
Gipaklaro usab ni Lim nga ang tulo ka indibidwal “positive initially” sa urine screening.
Ang ilang mga sample ipailalom pa sa confirmatory test aron masiguro ang resulta.
Sumala pa sa opisyal nga kung positibo gihapon ang confirmatory result, ang LTO magpagawas og show cause order (SCO) batok sa mga respondent drivers.
Dugang pa niya, ang ahensya mag-andam og resolution nga isumite sa LTO Central Office alang sa final order, nga posibleng magdala sa pagkansela sa ilang professional driver’s licenses.
