DAVAO CITY – Nag-atubang na karon og kasong paglapas sa R.A. 9165 o Comprehensive Dangerous Drugs Act of 2002 ang usa ka 19-anyos nga lalaki human nga naharang kini sa checkpoint sa Sirawan, Toril sa mga personahe sa Task Force Davao ubos sa pagdumala ni Col.Consolito Yecla, Task Force Davao Commander.
Ang suspek giila subay sa iyang driver’s liscense nga si Erl Cesar Pitogo Camiso nga taga Nabunturan, Davao De Oro.
Narekober sa nahisgutan ang lima ka mga dagkong pakete sa iligal nga druga ug usa pa ka pakete nga tanan adunay gimbug-atong 255 grams diin adunay street value nga mukabat sa P4,080,000.
Nasayran nga sakay ang suspetsado sa Toyota Vios gikan sa Cotabato City ug padulong unta kini sa Nabunturan Davao de Oro.
Sa dihang milabang na kini sa inspection area alang sa mga pampribadong sakyanan, naharang na kini sa mga personahe sa Task Force Davao.
Misulay pa sa pag-ikyas ang suspetsado hinungdan nga nanawag og kapulisan alang sa pag rekisa sa maong sakyanan ug sa suspetsado.
Mipadangat og pagdayeg si Mayor Inday Sara Duterte-Carpio ngadto sa mga kapulisan gumikan sa malampusong pagkasikop sa nahisgutan.
