DAVAO CITY – Mikabat sumala pa sa 17 gikan sa 97 ka mga na-inspeksiyon nga government buildings sa siyudad ang gideklarang dili luwas.
Sumala pa kang konsehal ug committee chair on public works and highways Edgar Ibuyan Jr. nga pipila ka mga gambalay nga kalakip sa listahan ang delikado na nga gamiton.
Kalakip sa 17 buildings ang Davao City Overland Transport Terminal (DCOTT), City Social Services and Development Office (CSSDO) building, Toril Public Market (Old Building), Sta. Ana National High School, Dalagdag National High School (a two-story DPWH project), 2nd building sa Philippine Coconut Authority (PCA), Barangay Hall of Brgy. Mudiang, Mudiang National High School, Mudiang Elementary School, Duterte National High School, Doña Soledad Dolor Elementary School, Talomo National High School, Sixto Babao National High School, Armed Forces of the Philippines Learning Center (AFPLC) sa Panacan, Daniel R. Aguinaldo National High School, Congressman Manuel M. Garcia Elementary School, ug Agdao Elementary School.
Gikanayon ni Ibuyan nga ang mga liki ug uban pang manifestations sa kadaut ang namatikdan sa mga gambalay diin pipila ang girekomenda nga mopailalom sa hinanali nga pagkumpuni.
Gisugyot sab karon ang pagbungkag sa retrofitting sa pipila ka mga gambalay sama sa Toril Public Market.
Gimandoan sab karon ang mga administrators sa tulonghaan nga dili gamiton kadtong mga gambalay nga nakaangkon ug dagkong mga liki.
Kahinumduman nga una ng gibutyag sa Department of Education (DepEd) Davao Region nga adunay kinatibuk-ang 440 ka mga nadaut nga classrooms tungod sa linog diin kadaghanan niini ang gikan sa Davao del Sur.
