Patay ang usa ka lalaki ug angol ang usa ka babae human nga nalambigit sa bangga kagahapon sa buntag sa National Highway sa Brgy. Magnaga, Pantukan Davao De Oro.
Subay sa report sa mga otoridad, giila ang mga biktima nga sila Romel Labrador, 17-anyos residente sa Purok 5, Barangay Bongbong, Pantukan samtang ang backride niini giila nga si Clarise Pagnaan, 15 anyos, residente sa Purok 2, Barangay Tagdangua, Pantukan.
Sa inisyal nga imbistigasyon sa mga otoridad sa kapulisan, nagsakay ang mga biktima sa motorsiklo nga TMX nga dungan sa Bachelor Bus nga gimaneho ni Donny Bacarro, 38 anyos, nga residente sa New Visayas, Matina, ning dakbayan sa Davao apan kalit sumala pa nga misulod ang motorsiklo sa inner lane nga gisubay sa bus nga kusog ang dagan niadtong higayuna.
Gumikan sa nahitabo, nabanggaan ang motorsiklo og nalagpot ang mga biktima sa semento nga bahin sa karsada. Dali usab nga gitabang ang mga biktima apan nakabsan sa kinabuhi ang drayber sa motorsiklo samtang ang babaeng angkas ang gidala sa ospital. Sa pagkakaron nagpadayon pa ang gihimong imbistigasyon sa mga otorridad kabahin sa maong panghitabo.
