Girescue sa kapulisan ang usa ka 16 anyos nga menor de edad human nga nangawat og stroller sa GSIS Heights, Matina Crossing ning dakbayan, pasado alas 10 kagabie, Pebrero 23 ning tuiga.
Nasayran nga ang wala ginganlang menor de edad lumulupyo usab sa gikaingong dapit diin girescue kini sa kapulisan human nga misaka kini sa atop sa ilang silinganan aron nga musibat sa dihang namatikdan niining miabot na ang otoridad.
Subay sa report sa kapulisan nga nakadawat sila og tawag gikan sa tagtungod sa gikawatang panimalay kansa giila ang tag-iya nga mao si Mona, 30-anyos.
Sa inisyal nga imbestigasyon, nakit-an sa anak niini ang maong suspek diin gilayon nga midangop sa kapulisan rason nga nadakpan kini human sa gipahigayong hot-pursuit operation.
Apan, sa kabahin sa suspek, gihimo lamang matud pa niini ang krimen gumikan duna kini anak ug dili matud pa kini makapalit og stroller.
Lakip sa narekober sa kapulisan ang usa ka puti nga pantalon ug t-shirt diin naabtan pa sa otoridad nga gisuot niini ang saninang iyang gikawat.
Apan,nasayrang lango matud pa ang dinakpan og ilimnong makahubog gumikan ayha pa man matud pa niini nabuhat ang krimen, nakigtagay pa kini sa iyang higala nga giilang si alyas Chevy ug ang amo matud sab niini.
Gani, human sa tagay, nakadesisyon kining mupalit og softdrinks sa tindahan ug didto matud pa niini nasiplatan ang stroller nga iyang gikawat.
Ang maong suspek, gi-turn over na ngadto sa Women and Children Protection Desk gumikan sa linghod nga pangidaron niini.
