DAVAO CITY – Mukabat sa 14 ka mga estudyante sa Grade 4 students sa AMA learning center sa Malvar ning dakbayan sa Davao ang nadala sa balay tambalanan human nga nangalanag ang mga nahisgutan sa ilang gikaon nga pack lunch nga gipalit sa usa ka iladong fast food chain sa illustre St. ning dakbayan.
Sumala ni alyas Roselle, usa sa mga inahan sa estudyante sa Grade 4 sa maong tulonghaan, gi-treat niya ang mga bata isip pahalipay sa nahisgutan sanglit wala sumala pa nakasaulog ug birthday ang iyang anak gumikan kay gikan pa siya sa abroad ug nanarbaho.
Aduna sumala pa siyay gisugo nga usa pa ka ginikanan aron nga mopalit ug pack lunch sa usa ka iladong pambata nga food chain ug pag-abot niini pasado alas onse sa udto, diretso kini nga gihatag sa mga bata.
Apan paglabay sumala pa sa halos usa ka oras, usa-usa na nga nanakit ang tiyan sa mga bata ug nagsuka-suka hinungdan nga gipangdala kini sa balay tambalan.
Sumala kang alyas Roselle, walay lain nga gikaon ang mga bata kung dili ang nahisgutan nga pack lunch nga gilangkuban sa piniritong manok, kan-on ug softdrinks.
Hinuon dili sumala pa tanan ang nakasinate ug pagpanakit sa tiyan gumikan kay sa 36 pack lunch nga ilang gi-order, 13 ka mga estudyante lamang ang nakasinate ug pagpanakit sa tiyan. Dugang pagpanubay karon ang gihimo kalabot sa maong insidente.
