Nagbangutan ang pamilya sa 13 anyos nga batang babaye human nakaplagan ang patayng lawas niini sulod sa kapilya sa Brgy. Hipusngo, Baybay City, Leyte.
Giila ang biktima nga mao si Mary Jane B. Nayre, kansa nawala niadtong Marso 15 ning tuiga ug nakit-an na lamang nga gisulod sa sako ug gibutang sa ilawom sa altar sulod sa kapilya.
Sumala sa mga otoridad, gilugos ug gipatay ang dalagita kansa buntag pa lang sa nahisgutang adlaw nga nawala kini, gisugo pa kini sa iyang amahan aron magpalit ug pagkaon, apan wala na kini nakauli.
Ang giingong responsable sa maong krimen mao si Francilet Sacay, ang caretaker sa kapilya ug silingan sa biktima.
Giingon nga dugay nang adunay plano ang suspek sa pagbuhat sa maong krimen, apan sa dihang dakpon na unta kini, nakasibat na kini. Nagkahiusa ang pamilya ug mga silingan ni Mary Jane sa pagpangayo og hustisya.
Nanghinaot ang pamilya sa biktima nga madakpan na ang suspek ug mahatagan og hustisya ang kamatayon sa dalagita rason nga nanawagan ang kabanay sa biktima ngadto sa publik nga mudangop gilayon sa pinakaduol nga police station aron hingpit na kining madakpan.
