Padayon ang kampanya sa Davao City Police Office batok sa kriminalidad ubos sa liderato ni PCOL Mannan C. Muarip, uban sa aktibong suporta sa komunidad ug mga opisyal sa barangay aron mapadayon ang kalinaw ug kahapsay sa dakbayan sa Davao.
Sulod sa usa ka semana nga operasyon, nakapahigayon ang DCPO og 32 ka anti-illegal drug operations nga misangpot sa pagkasikop sa 36 ka mga suspek.
Nakompiska usab ang 46.0807 gramos sa shabu nga adunay Standard Drug Price (SDP) nga Php 313,348.76, ug 15.14 gramos sa marijuana nga nagkantidad og Php 1,816.00.
Samtang sa kampanya batok sa iligal nga sugal, nakapahigayon usab ang kapulisan og 9 ka operasyon nga misangpot sa pagkasikop sa 9 ka mga nalambigit sa sugal, pagkumpiska sa Php 2,270.00 nga pusta, ug pagpasaka og 9 ka kaso.
Samtang sa operasyon batok sa mga wanted persons, nakapahigayon ang kapulisan og 84 ka operasyon nga misangpot sa pagdakop sa 84 ka indibidwal, lakip na ang 37 ka most wanted persons.
Sa bahin sa kampanya batok sa loose firearms, nakapahigayon usab ang kapulisan og 11 ka operasyon nga miresulta sa pagkasikop sa 3 ka suspek ug pagkumpiska sa 3 ka armas.
Dugang pa niini, 7 ka armas ang boluntaryong gisurender, usa ang narecover, ug usa ang giturn-over alang sa safe keeping ubos sa Oplan Katok, samtang 3 ka kaso ang napasaka.
Sa kinatibuk-an, 116 ka indibidwal ang nadakpan tungod sa nagkadaiyang kalapasan sa balaod.
Sumala sa DCPO, kini nga kalampusan nagpakita sa ilahang padayon nga dedikasyon sa pagpatuman sa balaod samtang ginatuman gihapon ang human rights ug ang tukmang Police Operational Procedures.
Gipasabot sa DCPO nga ang maong kalampusan bunga sa dedikasyon sa mga pulis ug sa lig-on nga panaghiusa sa komunidad, mga opisyal sa barangay, ug sa lokal nga gobyerno aron mapadayon ang malinawon ug luwas nga nga syudad sa Davao.
