DAVAO CITY – Daghanang mga balay ang gilamoy sa dakong sunog nga nahitabo sa Zone 2 ug 3, San Antonio, Buhangin, Davao City alas 2:30 ang takna sa hapon karong adlawa.
Subay sa inisyal nga imbestigayon sa mga otoridad, nagsugod sa panimalay ni Pablita Morales, 50 anyos, tindera og balut ug residente sa nasangpit nga lugar ang maong sunog gumikan sa napasagdan nga nilung-ag nga balut gamit ang usa ka butane.
Dali dayon nga mikaylap ang kalayo sa kasikbit nga kabalayan nga gama sa mga light materials.
Walo ka mga balay ang gikatalang hingpit gayud nga naugdaw o totally burned kung diin gipanag-iyahan kini nila Emperiatriz Apique, Joey Dela Cruz, Leonito Mamac, Crestel Sayman, Loceto Figar, Erwina Galvez, Reynaldo Israel ug Gumersindo Jala.
Samtang partially burned sab ang mga panimalay nila ni Bryan Generama ug Chriz Jean Bolosito.
Nasayran nga mikabat sa P210,000 ang namugnang danyos gumikan sa maong sunog.
Kauban nga miresponde sa Bureau of Fire Protection (BFP) Buhangin ang Central 911 Fire Brigade ug Filipino Chinese Fire volunteers.
Human sa usa ka oras, gideklara kini ni SFO2 Segundo Dumasig Jr., duty fire investigator sa Buhangin Fire Protection (BFP) nga fire under control.
Subay niini, walay gikatalang angol o kaha patay sa nahisgutang sunog.
