Gilusad sa gobyerno ang pinakadakong puwersa nga 10,000 ka TUPAD workers aron ipatuman ang Expanded Bayanihan sa Estero Program, nga opisyal nang gisugdan niadtong Hulyo 1, 2026. Sumala pa, tumong sa maong programa ang pagpakunhod sa pagbaha sa mga komunidad ug mga nag-unang dalan sa Metro Manila, ilabina karong nagsugod na ang panahon sa ting-ulan.
Dugang pa niini, gipahayag ni Executive Secretary Ralph Recto nga ang mas gipakusog nga operasyon nagtuman sa direktiba ni Pangulong Ferdinand Marcos Jr. nga palig-onon ang mga lakang aron mapanalipdan ang mga komunidad nga kanunay maapektuhan sa kusog nga ulan ug pagbaha. Lakip sa nanguna sa implementasyon sa programa ang Metropolitan Manila Development Authority (MMDA) uban sa Department of Labor and Employment (DOLE). Ang mga benepisyaryo sa Tulong Panghanapbuhay sa Ating Disadvantaged/Displaced Workers (TUPAD) maoy mopahigayon sa paglimpyo sa mga estero ug kanal, pagtangtang sa lapok ug basura, ug regular nga pagmintinar sa mga agianan sa tubig sa tibuok Metro Manila.
Matud pa ni Recto, nasayod ang gobyerno sa kalisod nga giagian sa mga residente matag higayon nga adunay kusog nga ulan, busa gipalapad ang programa aron mas dali matangtang ang mga bara sa mga estero ug mga agianan sa tubig ug sa ingon makunhuran ang pagbaha. Dugang niya nga padayon ang implementasyon sa maong programa sulod sa tuig. Kahinumduman, gisugdan ang gipalapad nga programa human gipangunahan ni Recto ang usa ka koordinasyon nga miting uban sa Department of Transportation (DOTr), Department of Public Works and Highways (DPWH), MMDA, ug DOLE, aron paspasan ang pagpangandam sa gobyerno alang sa ting-ulan ug mapalig-on ang hiniusang aksyon sa nagkalainlaing ahensya batok sa pagbaha sa Metro Manila.
Sa kasamtangan, gipasiugda sa gobyerno nga samtang gipadayon ang dugayng mga solusyon batok sa pagbaha, ang Expanded Bayanihan sa Estero Program maoy usa sa labing dali nga paagi aron makatabang sa pagpanalipod sa mga komunidad nga pirming maigo sa baha.
