DAVAO CITY – Anaa sa 10 ka mga langyaw nga anaa sa dakbayan sa Davao ang ipa-deport human nga nag-overstay na kini sa nasud.
Sumala pa kang Sittie Rizminh Alonto, alien control officer sa Bureau of Immigration-Davao, ang nahisgutan nga mga illegal aliens nga papauli-on sa ilang nasud kini tungod dugay na matud pa nga na-expire ang ilang mga visa.
Naghulat na lamang sila karon og deportation order gikan sa ilang head office sa Manila.
Ang nahisgutan nga mga langyaw gilangkuban sa upat ka mga Americans, usa ka Indonesian, usa ka Canadian, usa ka Pakistani, usa ka Australian, usa ka Italian ug usa ka Korean.
Gitataw sab ni Alonto nga dili gilayon mamahimo nga papauli-on ang tulo sa nahisgutan nga langyaw gumikan kay nag-atubang kini og kaso.
Usa ang gipasakahan og kasong kalapasan sa Republic Act (RA) 7610 o Special Protection of Children Against Abuse, Exploitation and Discrimination Act sa Regional Trial Court (RTC) Davao.
Samtang ang laing duruha ang nag-atubang usab og kasong kriminal sa General Santos Municipal Trial Courts in Cities (MTCC) sa RTC Davao.
