Gisuspetsahan karon sa Philippine Navy nga gikan sa mas dako nga barko ang gigikanan sa kapin 1.5 toneladang shabu nga nasakmit sa ilang mga personahe 50 hangtod 60 nautical miles ang gilay-on gikan sa baybayon sa Zambales.
Ang maong shabu gibana-banaan nga nagkantidad og P10 bilyon ug nasakmit kini sulod sa usa ka gamay nga fishing vessel, nga gisakyan sa usa ka langyaw ug upat ka Pilipinong mananagat.
Sa usa ka press conferrence, gipadayag ni Northern Luzon Naval Command Commander Commodore Edward Ike De Sagon nga wala pa nila matino kung asa nga barko gikan ang maong ilegal nga droga.
Ilang gituohan nga tuyo nga gipalusot ang mga 50 ka sako nga shabu sa West Coast sa Luzon.
Gisaysay ni De Sagon nga ang pagdakop sa maong fishing boat kabahin sa operasyon ug mandato sa Philippine Navy nga magpabiling alerto human sa daghang mga insidente sa mga nanglutaw nga droga sa kadagatan sa Zambales
Nahimong kadudahan ang lihok sa maong bangka, gumikan wala kini nakig-uban sa ubang mananagat, ug namatikdan nga nag-inusara ang mananagat.
Dugang pa sa taho, bisan wala silay nakita nga ubang fishing boats sa palibot sa bangka, dili nila isalikway ang posibilidad nga dili kini unang higayon nga nahitabo ang ingon niini nga klase sa transaksyon, ilabi na nga adunay mga susamang insidente nga natala sa miaging mga semana.
Sa pagkakaron, padayon ang imbestigasyon sa Philippine Navy uban sa ubang ahensya sa gobyerno aron matino kung kinsa ang mga responsable sa maong insidente.
