DAVAO DEL SUR – Nagpahimangno karon ang mga otoridad sa Malalag ngadto sa mga drayber sa trak nga susihon una pag-ayo ang preno sa sakyanan ilabi na kung kini mga dagkong trak ug adunay bug-at nga mga kargamento aron nga malikay sa disgrasya.
Kini ang pahimangno sa mga otoridad human sa pagkahulog sa usa ka 18-wheeler truck sa pang-pang sa Baluyan Road, Barangay Tagansule, Malalag, Davao del Sur niadtong adlaw nga Lunes pasado alas siyete sa gabii.
Subay sa report sa kapulisan naila ang drayber nga wala nakambak sa iyahang gimanehong trak nga si June Poblador Salvador, hamtong ang pangidaron nga residente sa Brgy.Lagao, General Santos City.
Sa gihimong imbestigasyon sa kapulisan, samtang naglawig sa maong dalan ang 18-wheeler truck, kalit sumala pa kini nga misarasay ug napadulong kini sa pangpang nga bahin daplin sa karsada.
Tungod sa kahabog sa pangpang,nakaangkon ug danyos ang trak ingon man nakahiagom ang drayber ug mga samad ug bun-og sa iyahang kalawasan.
Na-rescue pa kini sa Mdrrmo Malalag ang biktima ug nahabwa kini sa sulod sa trak, gidala sa Davao del Sur Provincial Hospital ang drayber apan gideklara kini nga “dead-on-arrival.”
Sumala pa sa gihimong imbistigasyon sa otoridad, naputol sumala pa ang brake nga maong hinungdan nga nawad-an ug kontrol ang drayber hinungdan sa pagkahulog niini sa pangpang.
