Usa ka tawo ang nakabsan sa kinabuhi human matumpag ang usa ka building sa siyudad sa Manado sa lalawigan sa North Sulawes gumikan sa kusog nga linog.
Matod sa usa ka residente nga kusog kaayo ang nasinati-an nga linog sa palibot sa Manado.
Sa pagkakaron, nagpadayon pa ang gihimong pagsusi sa kadaot nga nahatod sa maong pagtay-og. Usa usab ang naangol atol sa maong panghitabo.
Una nang mipahimangno ang Pacific Tsunami Warning Center nga nakabase sa Hawaii nga posible ang delikadong tsunami waves sulod sa 1,000 kilometro gikan sa epicentre sa baybayon sa Indonesia, Pilipinas, ug Malaysia.
Natala usab ang 30 sentimetro nga balod sa lalawigan sa North Maluku.
Sumala sa United States Geological Survey, ang linog nga giubos sa 7.4 nahitabo sa kadagatan nga bahin gilawomon nga 35 kilometro sa Molucca Sea taliwala sa Sulawesi ug Maluku kaganihang buntag.
Samtang, ang mga earthquake monitoring centers sa Pilipinas ug Malaysia wala magpagawas og tsunami alerts.
Nasayran nga ang Indonesia ug mga silingang nasud kanunay makasinati og mga linog tungod kay nahimutang kini sa Pacific Ring of Fire.
Kahinumduman nga niadtong 2004, usa ka linog nga adunay gikusgon nga magnitude 9.1 niigo sa lalawigan sa Aceh nga mihatod sa kusog nga tsunami ug nakamatay og kapin sa 170,000 ka tawo sa Indonesia.
